Esprit كرزة

ثمّ واحد كرزة يخدم في واحد معاه "مرتو تقول للقمرة ازرق و الا خلي نزرق" ... بالطبيعة تضرب فيها و داخ في امرو, فدبّرو عليه أولاد الحلال باش يبعث راجلها في مهمة طويلة في الخارج و يخلالو الجو مع للاّت الزين و العين ...
كان الأمر كذلك ,و مشى الرويجل لبرا

ايا سيدي الليل طاح, و العرف خرج متخفّي و قصد دار المرا ...
دقّ الباب ...
"اشكون؟"
"حلّ الباب ما تخافش"
"ما نحل إلاّ ما تقلّي اشكونك انتي"
"عرف راجلك يامرا ... جيت نتفقّد فيك ..."
ماصدقتش بالطبيعة ....تجبد إيد متاع بالة و تاقف ورا الباب
" ... ايّا برّة روّح لا نقول فيها ووه و نلمّ عليك الناس "
اتغشش الراجل و كلاها في قلبو و سكت, خاف من الفضيحة و قالك اذا ندخل بالسّيف يمكن تسمع مرتو و تحرّش فيه اولادو يطيّروه كي الساشي

رجع للدار و قعد لا يكلم حد - لا يخلّي حد يكلمو ... يخمم ...و يضرب اخماسو في اسداسو
للي جاتو مرتو غاظها حالو و سخفت عليه, الراجل نهارين لا ماكلة لا شراب

"شبيك تخمم يا راجل؟"
"لا لا شي ما فمّ"
"قلّي بركة , مش باهي تخلّي في قلبك , انا في خدمة رويجلي..."
"قتلك ما عندي شي و قيلني توّة"
"بالكشي حاجتك..بني.....ة"
يقسّ عليها
" ما حاجتي بشي , فكني اعتقني لوجه الله ناقصك انا توّة يعطك دا على المنظر "
"ياخي انا شنوّة قتلك " تشدها الغصّة " كل مرّة نجي باش نقلّك حاجة و انتي تصيح عليّ...فدّيت راني فديت و كرهت حياتي..."
قام الملك بعد ما سبّلها جد والديها و قلب الطاولة و بدا يكسّر في الماعون و قلب هاك الدار سافيها على عافيها و اولادو فاصعة , يا ويلو اشكون ياقف قدّامو ...
في قلبو يقول
"انا اغنى راجل و مانجمش نشيخ مع المرا اللي عجبتني ... انا اللي فلوسي بالكدس في البانكة ودياري مانعرفش طرف

خلاها فين وكراهبي وماشاريعي

..."
وفي لخر قرر باش يصدم بصحة رقعة

ايا سيدي مشا و هز معاه ...خدمانو هازين معاهم الذهب والفلوس وكل خير
و دخل سيدنا لدار المرا معزز مكرم وقعدو خدمانو في الكيّاس يستناو تحت الحيط ليلة كاملة

.......

A suivre…