استاذ الماط والفيزيك واستاذة التكحيل

عرفتوها التصويرة هاذي ؟

بالطبيعة وعرفتوني علاش نحكي

على العودة المدرسية بالطبيعة خاصة ونحنا على ابوابها وهاكصغيرات مساكن باش يترزاو في شيخاتهم وتشخليعاتهم ,تصبيحاتهم, وسهريات اليل والبحر

تفكرت روحي قبل كيفاش كنت نرجع حزين رزين متغشش ....مكرز ومكرور من خشمي

كانت حاجة بركا تصبرني

هيا انو الواحد باش يتعرف على اساتذتو الجدد

واساتذتو هاذي الى قلتها جمع اناث بركة

موش محبة في خليقتهم الحرفة والا باش نجي لول .....لا لا

باش نحندرو* استاذة التكحيل والى نعملو علاها عام كامل ونلقاوها وقت الغصرة والشياح

القراية كانو يستناو في اساتذة الماط والفيزيك ويقعدولهم من قدام باش يجيو اللوالة

ونحنا (شلة التكحيل) نقعدو في الصفة لولا كان في سوايع الاساتذة هاذم

هوا ماو المثل التونسي يقول "احسب حسبة تتطلعلك عصبة " .........انا هكاكة

كل عام الاساتذة الكل ذكورة واذا حشيتو وجابولك بروفة راهي حاشا خليقة الرحمان ضبعة

ملا ايامات

!!!!

نحندرو*=جمع يحندر مرادف لكلمة" يقانس

NB:وكان مافهمتوش( يقانس) لينا وليك ربي