عــيــد "الـ" مــرأة

بمناسبة إحتفالنا في تونس بعيد المرأة حبّـيت نتقدّم بأحرّ وأصدق التهاني للنساء ونقوللهم كل عام وإنتوما حيين بخير يا

عزيزاتي الباهين

لكن كيما تعرفوا العيد هذا إسمو عيد "الـ" مرأة، موش النساء، وهذا يفترض أنها فمّا حاجة تتكوّن من مجموعة متجانسة وتكوّن هي بيدها ذات مستقلّة على بقية الذوات في وسط المجتمع، وهذاكا علاش جات الصيغة في المفرد موش الجمع وزيد جات معرّفة

هذا يفترض باش تكون فمّا حاجة باينة ومعروفة عند الناس الكلّ إسمها "المرأة"، ويقابلها من جهة أخرى "الـ" راجل، وهذا بالطبيعة غالط، على خاطر الإنتماء البيولوجي لجنس الإناث أو الذكور ماهوش كافي حسب رأيي باش نجمعوا الناس الكل في نفس الباكو، على خاطر المجتمعات ما عادتش بالبساطة متاع المجتمع البدائي اللي يسمح بالتقسيمات هاذي متاع ذكورة تحاوز في الحلّوف ونساء تجمع في الطماطم وتنظّف في الديار وترضّع في الصغار

كيف تقولولي عيد المرأة التونسية أنا نفهم أنّو عيد تحتفل بيه أمّي و فاطمة بوساحة و....الخ

والبنيّة اللي تخدم في معمل خياطة ب180 دينار في الشهر والملاهط اللي يخدمو في السّعدي والموّال وغيرهم ب100

دينار في الليلة.

المرأة التونسية اللي نعرفها أنا تنجّم تكون أي حاجة من التلميذة والطالبة والقاضية والمحامية والموظفة

يعني شكشوكة كلبة ما تفرز منها شيء، وبالرغم من هذا مازلنا نحبّو نحتفلو بها الجمع الكريم في يوم واحد. علاش لا؟ المرّة الجاية نحتفلو باليوم الوطني للدفاع عن الحيوانات الأليفة نهارة الدور النهائي متاع كاس تونس لمصارعة الأكباش، مشكلة هي؟

حاسيلو ما دامتو شادّين صحيح باش نحتفلو اليوم ب"الـ" مرأة الوحيدة والفريدة اللي يتلخّصو فيها معاني الإنتماء الجنس اللطيف، فإنّو واحد كيفي أنا ما ينجم يقول كان ألف مبروك للمرأة الحقيقية الوحيدة في العالم اللي هي كيما يعرفو

الناس الكلّ عزيزتي "مونيكا بلّوتشي

مبروك عزيزتي وكل عام وإنتي "الـ" مرأة رغم أنف جيسكا البا وكل الممثلات الببوش بومصّة اللي قاعدين يطلعو من

هوليوود

وبالنسبة للأخرين تنجمو تستناو عيد النساء

:))

حقها عيد المرأة وفا عندو شهر

طلعت ناسيه !!!!