20 أكتوبر 2007

نمشي للبحر ونشكيلو :::يابحر الى عملتو معاها صحيح ولا لا ؟

طول عمرو فرخ بزناس يطيح في البنات
يصرف على ملهط حاشاكم ويتلهمق لخرا
وديما ماشي...
يسهر مع وحدة تعلمو الفساد ووحدة يعلمها هوا
الحاصيلو عمل كريار باهي في الدومان وولا ولد حرام صرف
ولا كيما يقولو هوما ولد قح.....صرف
(حاشا امو مسكينة بنت حلال )
حتى لين كبر ووخر بيه لعمر وطاحت عليه سخطة من السماء هاكلي يقولوها
"عادات وتقاليد مجتمعنا"
طلعولو بطلعة اسمها" الاستقرار الزوجي" ولا واش من غريبة
ايا سيدي مشى معاهم في الخط وقال نعمل كيف الناس الكل ونبطل الخنن والتلوعيب

برا هكاكة لين جابتلو امو قطعة الى هيا قال شنيا بنت حلال كيف امو بالظبط
وكيف يقولوها بنت الحلال تعرف كان ولد الحلال....ااا بنت الحلال
وزيد قالو امو تختارلو خير ااه مالا بعد الى الطفل اللطف يعرف كان الى منعوتة بالصبع
والى تخدم بحزامها والى بحاجة اخرى ضربة وحدة حاشاكم
مخ الهدرة لحمش الطفل هالطفلة الى جابتهالو امو
لحمها وامورو كالزيت فوق الماء
ايا سيدي
هاو خرجها مرة تاكل حاجة ...وقعد شهر كامل هكاكة ماتحركوش ملماكلة والدمق ماو طلعتلو لهماقة وتلوح ياسر في الهمهامة كيف تحط البلاتو قدامها وتبدى ماعادش تغزرلو ب ربع العين...
ايا سيدي الشهر لي بعدو قال برا نبدلو نمشيو نعملو قهيوة في بواطة ميكست ...هوا مزال يخرج في السيقارو لول باش يعمر راسو مع القهيوة
اذا بيها مدتلو الشعول قالتلو ايا تشعل ؟ بيني وبينكم يحكيلي الطفل هاذا قالى بريكية مذهبة موش نرمال كيما الى كان يهدي ويهون فاهم هوا على البنات لخرين متع لحزام

ايا سيدي الطفل عمل وذن تشوف وعين ماتسمعش وشعل من عندها
وماكنتش ملعاكسين زادت جبدت باكو روايال وركزتو على الطاولة
تبسم الطفل وضحك ضحكة صفرة وقال بينو بين روحو" ااوه يعطيني عص...على كرايمي وانا مزلت نتكيف في الانتار" وباعها بلفتة ..

الشهر الى بعدو هزها تشوف في صياغة (بعد الى امو مزروبة والطفل كبر في العمر ومزال ماباتش ليلة وحدة مع مرا في الحلال)
ياسيدي كيف هزها للبركة الطفلة وخيتنا طلعت تعرفهم حانوت حانوت وتسلم على كل مولا حانوت وحدو بالبوس والتعنيق
وكل صايغي يقوللها وييييينك وييينك مازلنا نشوفو هالوجيه ؟
الحاصل ظاهرة الطفلة جاية قبلو مع الف طفل كيفو وهوا رقم 1132001 في حياتها
ايا الطفل خذا صياغة ب 9 ملاين وحشيالاف وقال هاذاكا مكتوبها ومكتوبي وروح فرحان
كيف يروح الطفل للدار امو تقولو: شنيا يا طفل ماشيا اموركم ؟
وهوا يقوللها والله يامي اول مرة نحس هالاحساس حاس برحي.....امو تتبسم ماشي في بالها الى وليدها فرحان بعروستو
وهوا يكملها في قلبو "حاس بروحي......طحان في النازلة"
حتى لين قربو ايامات التخربيش في الورقة
في عشية من عشيات السبت
الطفل تقلب في بيتو يمين ...يسار دخل على الانترنات دخل للميرك فد ...فوروم كيف كيف ....حط المفتاح في جيبو سكر باب بيتو وخرج يجري
خطف الطفلة من دار بوها في الكرهبة وقال موش حكاية هاذي ملا بيعة وشريا لازم نحس باها وتحس بيا شويا ياخي باش ناخوها مقرطسة ؟
وهزها لبقعة خلا وحط يدو على راسها وقربها باش يبوسها بوسة قبل الخطوبة بعد كليمتين حنان وحب زعما زعما
والطفلة شدت ما سيبت وشدت الصحيح تلوج على حكايات اخرا وتعمل في حركات يعرفها الطفل قبل
وشطرطاف !!!!!!!!!!!!! يعطيها بالكف
وقاللها: يا ملهط كان جاء عيني في الملاهط نلقى ازين منك يا سلعة بو رخيص يا سلعة بودورو دور بغافل اما انا كنت عايش معاهم!!!!!!!
ومن نهارتها ماعاودش لاشافها ولاشافتو ويعلق علاها التاليفون كل ماتطلبو
بعد الى حبتو يشدها ي..........(سامحوني بربي فما نومرو يطلب فيا نعلق عليه ونرجع)..

ايوااااه فين كنا؟
يا كاهو الطفل كل ما امو تعاود تجبدلو يقولها :امي مانيش متع عرس ! وخبا الحكاية على امو ...وتقولوهيا : يا فاسد وتاكل بعضها
يمشي الطفل للبحر يشكيلو ويقلو ااااااااااه يا بحر
هاني سمعت الى الايامات هاذي امو تركحلو في وحدة اخرى بنت فاميليا
اما الطفل ديييييويو قرر باش يرجع للبحر المرة هاذي اما موش باش يشكيلو باش يرمي فيه روحو


0 تعليقات:

إرسال تعليق

الاشتراك في تعليقات الرسالة [Atom]

<< الصفحة الرئيسية